(2) Dolski konfužjun

Dostoj se Gospodine (i ostal,o po običaju)
Štenje drugo
Dolski konfužjun
ili ti
Mome i njegov duh

Nojpri vajo reć da dolski konfužjun jemo, ko i svaki drugi konfužjun, svoj početak, sridinu i svršetak ili svoju glovu i rep. Rep se još ne vidi, ali ću van sada lipo adotat glovu  da se boje razumi današnji konfužjun.  Vajo reć da svako misto imo svoj konfužjun.

Kako onda, tako i danas, a judi su judi, ne učidu ništa od svoje povisti, pok opet se isto ponovjo.  Došo san za kurota  u Dol 1978. krajen lita. A bila je velo konfužjun u selu, provi barabon. Bilo hi je puno koji iz dišpeta prema kurotu nisu tili hodit na misu, pok su išli u Postira na misu, a pivoči nisu tili pivot.  A rozlog te konfužjuni je bi ča je kurot prema propisima Crikve mako balustrodu, ili kako ovod  zovu „kolone",  a oni poludili i štrajk. Evo kako to piše kroničar: ( jer je kurot bi iz Bosne, don Mijo Klarić, navest ću kroniku kako piše, da se ne bi promislilo da jo izmišjon).

1976. 23.VIII. „Postavljen novi kameni oltar prema narodu. Nakon što je nabavljen i novi oltar čekao skoro mjesec dana u crkvi da se riješi njegovo pitanje, danas je postavljen oltar prema smjernicama II. vat. sabora.  Oltar je izradila Industrija kamena Pučišća za  10000 din. Radove postavljanja izveo Josip Gospodnetić uz nužnu pomoć četvorice mladića pri postavljanju ploče. To su: Petrito Arnerić, Frane Matulić, Vicko Matulić i Vlatko Matulić. Isti dan pričesne klupe - balauštrade - su premještene pod kor. Zašto je oltar čekao svoju sudbinu? Nakon što je župnik najavio preuređenje prezbiterija ,nastala je neka vrst oporbe tom planu smatrajući da balaustrade - mogu ostat na starom mjestu. Župnik  je vjernicima koji su željeli razrješenje pokušao razjasniti smisao liturgijskih promjena i uloge „Novog oltara". Neki su shvatili i prihvatili. Neki su shvatili i prihvatili iz poslušnosti Crkvi, drugi nisu ni shvatili, ni prihvatili. Nastala je mučna situacija. Nastalo je verbalno prepucavanje iz tabora za i protiv. Uz to je bilo svakakvih ogovaranja i klevetanja. Nakon što je postavljen oltar neki su „pravovjerni" štrajkali ne dolaskom u crkvu, kasnije se „obratili". Kraj godine (4.miseca kasnije moja napomena) ipak je došao u priličnoj situaciji pomirenja duhova.  Zbog situacije i osobnog stava zahvalili su se na crkovinarstvu Ante Gospodnetić „Pište" i Ante Gospodnetić „Kralj." Najviše se predbacivalo da to još nije učinjeno u Postira. Ponavlja se stara istina da nepoučenost i neznanje sklerotiziraju i petrificiraju vjeru, da skoro postaje mrtva i takvima je određeni kamen važniji od Duha koji nas mijenja. Župnik je bio na udaru od muških, a pogotovo ženskih grla i jezika. Vrijeme liječi sve, to je smatrao i župnik, pa nije previše posvećivao pažnje glasovima, iako je trebao i morao, možda i reagirati, iako nije. Izgleda da je bolje što nije (a jo mislin da s današnje situacije gledono da je bilo boje da je reagiro jer se brž ovo sada ne bi ponovjalo). Kasnije su se zahvalili i druga dvojica  fabricera Jakov Arnerić „Kačilo" i Ivo Matulić „Zoje."

Nojžešći je bi jedon čovik koji se zvo Mome. Malo pomalo svi su se vrotili u domoću crikvu na misu, jer je i postirski kurot mako kolone. Naš Mome je osto zornji. On je bi nikada i fabricer.  I kad se i on jednega dona prišvajdi doć nose u domoću crikvu, vidi ga je jedon mončić, koji je bi malo betežan, pok kad je vidi Momu u crikvu, okriće se prema mami i govori: „Mama,...Mama... Mome... doso."  Možete mislit kakov je smih nasto...Kad već spominjen Momu, onda ću o njemu još po niku stvor navest.

Donkle kad san došo  za kurota u Dol u kući ni bilo pristojnog kupatila, a kondut je bi ispod skol u vlagi. I kako je ovega kurota uči profešur, pokojan Beretić: „Djeco, kad dođete na župu onda najprije, Bogu čast i dika, uredite zahod, a onda župnu kuću, a onda, Bogu čast i dika, crkvu. Jer ako je Bog mogo čekat do vas da uredite crkvu, čekat će još koju godinu da uredite i crkvu".  I kad je došo za kurota, poče  je uredivat jednu prostoriju za kupatilo. To ču naš Mome i jednega dona evo ga na vrota kuće sa velikon kavrjogon i viče na kurota: „E kojo je to oholija, popi su od kad je kuće hodili srat pod skale, a ti (priti kolcen kojega je digo visoko ) ti sada hoćeš moderno:"  Zatvori mu kurot vrota u gubicu i nastavi sa lavuron.  Dolski meštri nisu ni privirili blizu,  da se ne bi Momi zamirili .. a bilo hi je koji su mogli to učinit,  pok su sve napravili meštri iz Postir.

 

I tako kupatilo je bilo gotovo, ali ću se opet nonje vrotit a sada ćemo otpratit Momu. Bila je kasna jesen. Muški su se skupjali „na Spile" bilo je smiha, zafrkofonja ma bome i žestokih kontreštih i skondalih.  Mome je bi 12 godišć stariji od nojstarijega izmeju te klape.  Sidi u kantunu som. Kurot jedon put tako dohodi k njemu, a Mome je već bi dobro gluh, a zdrov ko krik. Ko zno koliko je izi zecih i jarebic, a oni koji su bili boji s njin su kurotu govorili da je Mome zno di je čo po gori. I tako  govori Mome kurotu: „E moj šor kurote, kojo je ovo meni bolest da jo ne mogu umrit..?" Ma inšoma Mome je na zornju umra. Ili je kurot misli da je Mome umra. Popkopali su Momino tilo, ali Momin duh je osto u selu. I Mome je ćuti da ne može umrit!

Jer kad je na jesen pasonega godišća biskup vidi kako propušćo voda u kupatilu, kako padaju pločice, kako  je palo komad plafuna u komori di kurot spi, kako nevojo posteja, a posebno štramci reko je kurotu da napravi zbog potribih jedno molo kupatilo gori na podu i da lipo uredi komoru da u njoj spi ko čovik, a da neka kupi dobru posteju, jer je to nojvažnije. Tako je i učinjeno. Meštri lavurali, parfin su i jednu nadnicu darovali,  napravi se lipi moli kondutić i kupatilo tako da je i kurotu, sada ništo starijen čoviku sa betegima, lagje po noći hodit u kondut. I baš je lipo mobilja kupjena i dobra posteja. I sve je to biskup ploti priko računi, da ni jedna kuna ni išla aremengo. I brž bi biskup bi do još da se ni jovi i ovi put Momin duh. Niki su po selu balili kako to kurot  podiže sebi standard. A niki od tih su rekli kurotu kad je pokozo kakavo je stonje u kući: „I jo čekon već 5 godišć da ništo napravin pok ni došlo na red". Drugi su opet blezgoli kako se kupilo po selu za kupit kurotu mobilju nose 20 godišć, a ovi oholun (misli na kurota)  sada sve meće ća. A libri drukčije pokažiju.  I u komori je bila posteja jedne vrsti, armerun druge, a kantunol treće vrsti. I  sve te  stvori su još u kući, oliš  posteje.

Nego reko san da Momin duh žive i sada. Sve to kurotu sliči na ono vrime kad je pokojan Jakica Brizić, Bog mu do sto pokojih,  iz Gornjega Humca bi diretur od jedne grone Caritasa, pomogo je puno župima na Broču, tako je reko i kurotu, kad je vidi kojo je žalost župsko kuća i crikva: „Počnite   lavurat. Pok kad dojde komisija dat ćemo pinez za dovršit." I kurot se razveseli i sazvo je i fabricere i glavore od mista na sastanak. I tumači in kako ćedu od Caritasa doć pinezi ako mi počnemo lavurat. Kad je to ču Glavor, poludi, tuče šakon po stolu: „neka oni nami dodu pineze pok ćemo mi činit kako mi znomo." Tako Caritas ne posluje i oni kojemu se doje pomoć ne može zaprduvot, nego vajo da slušo. E to ti je u ven selu teško. U to vrime je u kurota hodila svaku večer jedna klapa mlodih, pok ni se kurot tuži kako se neće dobit pinez,  pok su došli i počeli kopat  jamu za kondut (onda ni bilo bagerih ko danas) i ne lez vrože, došla je komisija baš u sri koponja i kad su vidili onda su doli pinez za dovršit kupatilo.  I tako je Glavor skrivi da ni došlo pinez ko u Škrip. Ali ni bi zato kriv Glavor, nego kurot, jer je samovojan i sve čeni na svoju ruku, tako se govorilo po selu. I puno je svita to popilo! Jer Glavor je Glavor (i njemu toko virovot po kakav bi da bi) a po kurotu toko pjucot - po makor bi svetac.

U Škrip ni bilo Mominega duha, plafun od crikve je bi po, grede od krova gnjil, i kurot je sazvo mišćane u dom, bi je to u ono vrime veliki kuroj. Ali Škripjani kad su čuli da imo šansu da se dobiju pinezi pitaju: „Ča ćemo šor kurote?" A kurot pridloži  da se raskrije crikva i uklonu grede. Prihvaćeno! Cilo selo je došlo i partijci i nekršćeni i oni koji su redovito hodili u crikvu i oni koji nisu hodili. Svi. I došla je komisija i kad su vidili kako Škripjani rodu, onda su doli pinez i crikva se počela pokrivat. Ali o temu ću kašnje, sad ovod hoću pokozat kako se dobilo pinez kad ni bilo Mominega duha.

 

E spominjen se kad san ko mlodi kurot došo na Brusje, isto tako ni bilo poštenega konduta, ni banje u kući. A bilo je pinez od prodaje levonde. Biskup je bi do za popravit krov od kuće. I sada zove kurot fabricere i pokažije nacrt kako će stavit zahod gori na pod. A pokojni  Mikolišta se zaškarpuni, poče vikat: kako ćete vi ovode spat, onde jist, a onamo srat. Ko je to vidi...i digo se i beštimajuć išo ća, a za njin drugi fabriceri da ga ne ofendidu... somo je osto zornji pokojan Dragutin Jeličićev i govori mi: „Šor kurote, lavurojte. ne badojte..." i napravi se kondut na podu. Napravila se i tekuća voda priko hidrofora, još nikor u Brusju u to doba ni imo tekuću vodu po kući. Mikolišta se smiri i kad je ču da je to puno lipo, kaligo se je i škužo šor kurotu i došo vidit kondut na podu. I kad je vidi odma je reko sinu: „Sinko stor san i teško je po noći hodit vonka,  homo i mi, ko kurot, napravit kondut ovod blizu kamare."

I još puno drugih sličnih slučajev ovod ili bilo di po svitu.

A ti Gospodine, pomiluj nas! (i ostalo kako je običaj).