Štenje 1.

Počinje skazanje štoriji o kurotu!

I ni baš lako noć kurota po želji, a ovi bi svakako moro bit takov. Jer ovo misto zaslužije jednega po njihoven guštu. Jer  to lipo potvrdiju  niki sveti oci. A da je uvik bilo kurotih koji nisu bili po guštu selu vidi se i po štoriji tega sela. Tako po guštu nikima  ni bi ni kurot koji je grodi crikvu nose sto godišć pok su izumili kako spi sa svojon kuharicon. I on je vaze Sveti sakramenat u ruke i zakle se da ni istina čo govoru. I svit je u crikvi proplako, a oni koji su širili takove gadarije - nestali su. Tih famejih već u Dolu nimo.

I protiv ovega kurota su govorili kakao spi sa jednon curon. E bilo bi se i njemu lako zaklet sa Svetim sakramentom, ali ovo nisu stori Doljani, ovi  niki novi ne viruju ni u Boga ni u Sveti Sakramenat, pok je vajalo da likor prigledo curu i da potvrdi da je nevina.

Sada se već i ne more bronit jer svi govoru „ Ne znoš ti ništa... kad biš somo zno.." A kad hi se pito ča je to doj rec, onda je odgovor isti: „ne znoš ti ništa..." Pok tako i kurot nezno ništa pok se ne more bronit. Ali  zato jemo ničega če mu pokažije kakovi su niki judi pok se zno ravnat jer ne pado jabuka daje od cabla.  I baš tako, jer borba onega koji je tuko na don Boga Uskrsa šakon po oltoru, na kojen je baš bila završila misa  i viko kurotu „Poć ćeš ća, poć  ćeš ća" njegov borba je pedeset godišć pri na don Boga Božića napravi barufu u crikvi. I ne semo to nego je jedne nedije dočeko kurota na cesti, a pri tega je moči grlo u jednoj konobi da mu ne bi zatojilo, a ovi su ga inpicali da pozdravi kurota sa: „Tovare, tovorski, dabojdo krepo do rano. Mrtvega te na čivire nosili."A nakon tega je  u selu lipo avanco.

Kad se ni kurotu  ovako naudilo onda su poslali mlode, one koje je kurot puno voli i koji su njega volili, ili su bili veliki falsuni pok kurot ni vidi da glumu ( a brž je i vidi ali se ufo da ćedu jednega dona bit judi). I tako se dogodila ono storo „ krsti vuka a vuk"  u goru.  Intanto oni su hodili kupit potpise po selu da se kurota makne. Pok kad ni tako  nisu uspili sad ti isti ga (oliš jednaga) ni puten ne  pozdravu. A ni one divojke koje su naučile ča je to Internet i druge stvori, hodile su  u kurota naučit. Hodilo se i skalovat s interneta i školske zadaće a i druge stvori. Sad te iste okriću glovu na bondu.  I bilo bi to tužno i žalosno da ni tega bilo kroz štoriju Dola.

Tako je kurot u prven svitsken ratu napravi jednu blagajnu da pomože seljocima priživit. I piše kroničar da su to judi shvatili „kao kravu muzaru" koju su svi muzli a nikor ni dovo kravi žerat. Pok je krava (blagajna) krepala,  a svit je govori (oni koji su ostali dužni) da se kurot obogati.

A kad je padre Pero Domančić, bili frotar, prediko u Dolu na Srce Isusovo 26.VI. 1946 o dvi bandire - jednoj Božjoj a drugoj vražjoj niki Doljani  koji su slušoli mislili su da se to misli na njih i njihovu partiju, pok su lipo tega frotra tužili a on je uleti nikoliko godišć u bajbuku. A oni su govorili „koji vrog ga je potezo za jezik da ono bali!"

Ma uvik je kurot kriv, pok i kad su bili prvi izbori onda je bilo od cilega  Broča nojslabije u Dolu  i bisni partijoši su na večer organizirali „serenode  protiv popovskih mantiji."

Kako i na Broču  tako i Dolu je bila užanca da se poli „badnjok"  za Božić , ma inšoma nikima je u Dolu i to smetalo, pok su tužili kurota, odnosno remetu. I kurot se je žali  „svuda na Broču se  poli badnjok, a na brdima i ognji za državne praznike",  ništa to ni vridilo jer je kurot ploti multu ili ti ga globu.

Ma ni smo zbog ognja nego i zbog zvonjenja, kad se ni smilo zvonit i slavit veće od tri minuta na don. I kad je došo biskup za posvetit crikvu zvonilo se puno od radosti, „A ipak niki su Doljani gledoli na leroj" I kurot je bi osuđen i ploti je multu.

Iz svega ovega do se razumit da su kuroti  bili somo judi od krvi i mesa a da je u Dolu bilo uvik onih judi kojima kuroti nisu nikako bili drogi. Pok su uvik trožili da kurot bude kako oni hoćedu. I ajme kurotu koji se temu usprotivi.

I još puno drugih sličnih slučajev  ovod ili bilo di po svitu.

A ti Gospodine, pomiluj nas!  (i ostalo kako je običaj).

___________________________

*Događaji koji se ovdje spominju - nisu izmišljeni, nego opisani prema župnoj kronici.