Ako nikoga piton če je to gej parada, svi ćedu odma reć. Ako te iste jude piton ča je to Taroška, onda ćedu se u mene zablenut ko koza kad vidi guju u kupusu.  Zato ovo proštijte, pok ćete znat.

Ma nimo naslov veze  sa ovin ludilon koji se dogojo po svitu da bi mogo ko god promislit da imo ovod pederih. Bože slobod, i još takovega zla. Pri bi se nošo koji god koji bi skoči na ovcu.  Nego san nikuda prošti da gej parada hoće reć veselo parada somo da su pederi zose prisvojili otu rič. Pok san došo na misal napisat malo o jednoj drugoj veseloj paradi kojo se ponovjo kroz  štoriju našega molega, broškega mista, a judi ko da su incukoni, pok vrlo brzo zaboraviju, ko da imaju niku tamašnu betegu u možjonima. Pok evo te štorije koju san izvadi iz župske kronike.

Započet ćemo sa 21.IX 1946. kad su u Postira dočekoli biskupa i napali ga jojima. Onda su u svin broškin mistima narodni odbori činili masovne sastanke i zakjučivoli kako nećedu primit biskupa Pušića, nego da će doć jedon narodni biskup. U Gornjen Humcu su pridložili da nećedu ni tega narodnega biskupa,  nego je nikor pridloži da se izabere nikoga iz Humca, pok je pala odluka da se izabere niko Taroška za biskupa. Nasto je smih i svit se razošo. A kašnje san dozno da je tu Tarošku pridloži borba od  bilega  frotra Šesnića.

Intanto sidin jo u kafiću i govorimo obo gej paradi kako su hi tukli u Split jojima, A jedon moj prijatej  govori da je to slično ko ča su u Postira tukli partizani biskupa jojima. U to pasoje mimo jedon meni puno drogi čovik, a baš je bi provi šenjadur na armonici i jo mu govorin: A če san ču da si se i ti hitivo na biskupa jojima, a on će meni ko iz topa: E da san jo imo onda joje bi bi ga izi, a ne ga hitivo na biskupa.

Inšoma, nastavmo štoriju. A meni je je palo na pamet  da bi i za ovo selo  bilo dobro da oni somi izaberu jednega biskupa, jer govoru da je ovi forski biskup gori nego njihov kurot. Ma bilo bi teško noć i posvetit nikoga za biskupa, vajalo bi onda imat i kanonike, a to bome ni lako, jer i nimaju tako puno svita koje bi mogli odgovorit za te časti.  Pok bi bilo nojboje da nojdu jednu Tarošku i da je učinu popon  (to je puno lašnje nego učenit biskupon) pok da njoj pivaju... Intato kad jedon put Taroška ulize u štoriju, nju se ne do istirot.

I tako se čuje da se uvik „poponja (tako niki zovu sadašnjega kurota) ako ne za vrime predike posere,  a onda    na kraju mise i da već nećedu hodit u crikvu. Intanto bi je običaj u našen molen mistu da se reče statistika od pasonega godišća na Vodokršće kad se pivaju blajdani. I kurot je ovega godišća to ostavi za kroj mise pok je malo reko i o temu kako stoji kasa, a kad je to ču jedno pivoč, a posebno kad je ču da je kurot od svojih pinez namiri te račune onda je reko "opet sere!"  i ni vragu slova ni slušo a još manje ču jer mu to ni hodilo u konat! Drugi pivoč ne gre u crikvu u mistu pivot jer  mu je „uvik grop u štunku, jer ne zno če će kurot na kraju posrat."  I moj pivoč skupi fameju pok u Postira na Božji Don na prisjecun.  E ma vrog do učinit, a Bog ne do sakrit i kurot se uželi lipeg prisjecuna, pok i on išo u Postira na prisjecun i tako ti prisjecun ni sprobi mojen pivoču, jer  ne somo da je moro gledot kurota, nego ga i slušot.

A rećemo i radi istine da je jedon (ime je zapisono na drugen mistu da se zno),  reko kurotu dvi nedije pri nego je poče štrajk" A ča ćete učinit ako van se crikva isprozni?". A kurot mu je odgovori da priko zime puno puti govori misu som po da može i od nedije. A vajo reć i to da ti isti dojde u Dol u crikvu par puti na godišće i uvi mu puno duro. On ko i njegov otac bi volili da pri svrši funcijun nego započne.

Nego štijen ovih don da su u Njemačkoj instalirali  protu papisu kojo je sebi uzela ime Rožica I. i nju bi lipo mogli dolski štrajkoči zvat u Dol da drži pontifikol, da ni krizmoje i pričestije dicu, jer kako se čuje dolsko Taroška nagovoro mame dice kojo tribaju počet hodit na dotrinu u svoga kurota da hi ne šaju.  Po bi brž i toj papisi Rožici I. mogla služit dolsko  Taroška ko kardinalica. A jer pivoči štrajkaju i ne pivaju u Dolu, pok je jedon pivoč reko jednoj ženi - fureštoj - kojo je redovito dolazila u crikvu u Dol - da ne gre u crikvu, jer oni ne pivaju. I furešta žena ne dohodi. Intanto mogli bi štrajkoči zvat papisu Rožicu I. u Dol da dojde. Somo ako dojde mogli bi njoj se dogodit ko i Pučišćanima. Loni su Pučišćani zvoli dolske pivoče da pivaju priko mise u Pučišća. I Pučišćani su hi lipo počastili obilatin ruškon. A Doljani kako su već širokega srca, a uskega žepa i zatvorenega takujina, pozvoli Pučišćane da pivaju u Dol i da ćedu in vrotit zojmice. Pučišćani se obradovali i mene pitaju kad ćedu doć. Kako hi jo nison pozvo pito san pivoče kad ćedu hi pozvat. Odgovor mi je bi „e nos je bilo dvonajst, a njih je trstipet.. po koće pokrit te troške." Ma intanto  mislin da bi se moglo i papisi Rožici isto dogodit i zato joj je boje da stoji doma.

Ma vidiš ti kako je to ofendijoži svit. Slušaju oni predike i olma pensaju nojpri komu je ovo zabi brokvu, a onda ajme ako vidi da je njemu bila brokva naminjena. Eto tako štijen u župskoj kronici: „Srce Isusovo - 26. lipnja 1946. Opet je došao otac Pero Domančić da ispovijeda i propovijeda. Bilo je dosta posla. Uobičajena procesija poslije podne je bila veličanstvena tako da se je o. Pero razdragao pa je na povratku na čimatorij  sa ulaznog zida održao temperamentnu propovijed o dvima zastavama Kristovoj i đavoljoj.  Bili su tu prisutni i neki partijci pa su se osjetili pogođenima kao da je aludirao na njih i njihovu partiju. Poslije je morao i o tome odgovarati kada je nakon misija sa kipom Majke Božje bistričke dospio u zatvor i proveo nekoliko godina."  A koliko znon somo je još jedon pop na Broču bi u pržunu zbog jedne predike na jednoj mlodoj Misi. Intanto predike su baš bile škakjive u Dolu jer su se o temu „naćakulali o predikama jer je to bilo onda najteže..." zapisano je  iste godine kad je don Mile doni sveto uje. A kad san već kod predik, onda ću reć da piše u kroniku kako bi Doljani za vrime predike izahodili vonka iz kora pušit. Pok je don Mirko odluči zatvorit kor. I napiso je da vajo to učinit oprezno, jer su judi u Dolu ofendijoži.

Nego kad smo kod špijunironja nahodimo i ovo zapisono : „ Don Mirko kažnjen zbog zvonjenja-  prigodom dolaska preuzvišenog biskupa 11.rujna  slavilo kako običaj bijaše stotinu godina. U ono vrijeme je Unutarnji pri općini odredio da se ne smije slaviti ni zvoniti više od dvije minute. I hoćeš vidjeti netko se pobrinuo da gleda na leroj i konstatirao da je prošlo dvije minute i don Mirko tužen. Sudac za prekršaje pri općini Brač dne 24. listopada 1957. odmjerio je don Mirku kaznu i nije uvažio žalbu pa je trebalo paltiti 2000 dinara. - Ako turistima  pri obalnom pojasu  i nekim činovnicima smeta zvonjenje i slavljenje, seljacima u unutrašnjosti zvona su muzika koju oni uvijek s radošću slave i doživljavaju... srića da je pinez..."

Nego ćemo spomenut ono daleko godišća sridinon sedandesetih godišć kad su komunisti na svaki nočin pokušovali uklonit križ iz sprovodih.  Nojpri nisu tili ulizat u crikvu sa krunon na kojen je bila petokraka koje su dovali borci za nike pokojne bilo borce ili bližu rodbinu. A onda nisu tili u sprovodu hodit iza križa, nego isprid križa. Intanto, umrla je jedna žena u Velo Grobje, mama dvojice palih  borci, a ovi kurot je pri reko da će frmat sprovod ako se to dogodi.  I izahodi sprovod iz crikve, križ, vjenci, pivoči, kurot i kotori onda kasil .. i govori mi jedon moli žokonj ili ti ga kotor : don Ivica, eno vjenac isprid križa. Jo fremo sprovod, remetu da zvoni, a kantaduri da fremodu pivot. „Ako vjenac ne ide iza križa, ne gren naprid.. nastalo je vikonje.. natezonje. .. „neka fameja odlući" „Fameja nimo čo odlučivot, oni su zatrožili crkveni sprovod i bit će ovako ili neće bit... I natezonje je duralo deboto pol ure. I nošlo se rješenje. Oni sa vjencen sa zvizdon išo je naprid koji stotinjak metri, ali uvik jedon zavoj isprid da ga se ne vidi... E sutra don me pozvola UDBA na odgovornost, pritili su mi i sa deset godišć prežuna.. kako jo ne poštijen mrtve, kako jo ovo, kako jo ono... Malo iza tega išo san u Vrbosku ispovidat. Imo san motor Pretis NSU 125 kubiki, oni veliki vergulasti motor...I nakon ispovidi i večere išo san doma u Brusje. Jedon kamion je, znon koji je bi šofer sa nikon ženskon u škuribodu i išo na drugu stronu, još mi je zasviri ...i jo priko „aredodroma" i Storega groda  doma.  Nakon dvo dona u večer evo jednega čovika, drće.. jedva stoji nanoge i govori: Don Ivane, vi ste još živi, a bili su van napeli žicu da vas pririže napola.. vi ste pasali a žice ni.. Jo san je toko skalat.. Ne znon koje je razape...jo san čeko da pasote i da skalon...i čekon jo kad ćete past s motora rasičeni...a vi živi...Hoće mi Bog ovo oprostit.. a jo se sto smijat a čovik me gledo zablenut.. Piton ga a jesi vidi oni kamion ča je bi u škuribondu... on je paso i rasiko žicu.. I tako vidiš bludon jednega čovika  meni je Bog sposi život, a tebe pakla...Zakle san se da ću na ono misto dignut spomenik bludu.. Ma učini bi jo to , ali ću onda dovest u perikul onega šofera a brž bi se i raspala fameja... Po za sada neka spomenik čeko...

A zoč ovo spominjen. Jer doslki pivoči štrajkaju i neće da pivaju od nedije.. I čujen da govoru da ćedu na sprovode pivot, jer da to ni nikakva misa nego počast onen pokojnen. I da jo nimon čo tot komandirat, jer da fameje hoće da oni pivaju... I palo mi je napamet da su to gore riči nego one u grobje nose blizu 40 godišć. Koji su vo kršćani koji govoru da se službon Božjon veličo nikega čovika. Sigurno je i njih naučila Taroška..Somo ćedu konti poć nopoko. A oni onda neka nojdu tarošku kojo će ni vodit sprovode u kojima se neće dovat slava Bogu i molit Boga za pokojnega, nego slavit pokojnik.

I tako se ovo smišno dolsko gej parada nastavije, a Taroška čini svoje !

A ti,  Gospodine, pomiluj nas.