Čujen njezine kroke
U noći škuroj
A brž u podneva ciceju
Nevere grmjavini
Ili mrtvoj bonaci
Ćutin njoj vonj
Pripoznajen je
Čekon je
Ne strašin se
Nimo ni srpa ni kose
Doće nježno
Šapjat mi na uho
Došla san
Reć ti
Od sad ćeš ti bit somo ti.
Skočen radostan
Srićan
Če me već neće mučit
Ni tilo
Da činin čo ne želin
Ni duša
Kojo već neće vapit
Za onin
Čo na zemji ne more dobit
Ni judi
Koji nikad nisu tili priznat
Da san jo jo
Nego su uvik od mene trožili
Da buden nikor drugi.
Gren
Čeko me Oni
koji me želi
Ovakovega
Koji me stvori
Do mi ovu dušu
Ove talente
Ovo čo jeson
Po čemu je svit misli
Da me poznaje
Kruto su se varoli
On će me zagrlit
I lipo mi reć
Nježno
Dojdi
Poznajen te
Od sada bud ti somo ti.
A če će to bit
Kako će to bit
Kakao će to izgledat
Kad nikad to nison ositi
Virujen
To će bit ROJ
I njegova će me rič
očistit
Od svega čo nison ti učinit
Od svega če su mi drugi
naprtili
Čut ću od NJEGA
Puno puti si falivo
Nisi svaki put bi na mistu
Sve ti oprošćon
Od sada ćeš bit ti somo ti
I to će rič
u meni izazvat ogonj
Muku strahovitu
Neopisivu
Jer ću vidit da san puno puti
Jo mogo bit još boji jo
Nego če san to bi
I onda ću čut
Pasalo je
Sad ti bud ti
Uvik si želi
činit
Meni na slavu
Judima dobro
To ti judi
Nisu nikad
Priznali
Sad te zoven
Dojdi
U moj ROJ
/pisma je napisona u noći od 3 na 4 rujna 2010
u 1 uru posli po noći dok san kuho varenik
za učinit vino za misu/