KRIZMA NIKAD I DANAS
Krizma nikada
bi san moli[1]
puno moli
na krizmu su me
parićovali[2]
hodi san
na misu
i na molu i na velu
i na večernju
hodi zvonit
uči dotrinu[3]
i ni mi žo
znon je danas
otac i mama
mi kuma nošli
rojeni borba[4]
večer pri
krizme
upali dvo čovika
u kužinu[5]
i rekli ocu
ako se moli
sutra krizmo
ne hod[6]
u prvidon[7] na posol
kako su došli
tako su i hodićali[8]
prez pozdravit
i to je prvo noć
koju pontin
da nison ni staka[9]
učini
ujutro san se digo
nošo mamu
u kužini
di plače
ništa mi ni rekla
jo san reko
doj mi robu
za poć u crikvu
jecola je
sad je vidin i čujen
zvona su zvonili
svi krizmanici su
došli
trojica ne
od te trojice
dvojica su se kašnje
potajno krizmoli
kum me prati
stoli smo u redu
niza crikvu
jo san bi
nikuda
na dno crikve
sa strohon božjin
velikon viron
koliko dite
može imat
primi san krizmu
kojo me pratila
i prati danas
kum me odve
na obid
ne znon če je bilo
darovo mi
nozuke[10]
i jedon kućarin[11]
Nozuke je otac iznosi
zbog tega je bi kuntenat[12]
a s kućarinon san kafu
svaki don ji
i to je bi moj kućarin
svi su to u kući znali
nesto je kućarin
kad se storo kuća srušila
nestalo je i kuma
ni mi ni čestito
mlodu misu
a svaku nediju
je kraj oltora
i za to mu sada
Bog do
zdrovje
a kad umre i pokoj.
znon i jednega
gorega kuma
svakega dona
je za oltoron
i prediko svake nedije
imo svoga kumića
a zonje ni nikada pito
a ćaća je molen umra
pri četiri godišća
KRIZMA SADA
krizmoju se
veli momci i cure
i čeni tejotar
od krizme
modna revija
ženskima se vidi
po škine
i kvarat sis
prozivo hi se
pri mise
tiro na dotrinu
većina za krizmu
i ne moru
niti hi briga
somo mislu
kad će du dobit
nojskupji roleks
ili motor
na kojen ćedu
sačuvoj Bože
izgubit tikvu.[13]
imo i jedon
manji broj
onih dobrih
i poštenih
mladićih
i cur
na koje se može računat
zato im svaka čast
jer svoj život
urediju
u strohu božjen
i sromu jusken[14]
biskup ispitije
ne znaju ništa
rekla mi je to
jutros
jedna mama
i jedon komunista
njegov se sin krizmoje
otac je bez vire
biskup je pozvo
krizmanike
kumove
roditeje
krizmanici
ko telci
ništa ne znaju
biskup se trudi
da čagod reču
ali ništa
i govori mi komunista
da sa jo
na biskupa misto
potiro bi bi sve
odma smista
biskup ni to
učini
nego je krizmo
i tako
pokozo
da
ne triba držat
do svetega sakramenta
jer je i onako
sve pulenta
pod mison
je bi konfužjun
ko da se na pjaci
prodoje
roba ispod cine
biskup viče
mušte
a ko će mučat
kad nikor i ne zno
ča se dogojo
a još manje viruje u to
i onako je ovo
za većinu krizmanikov
zbogon crikvo
jer već ni u kasilu
ga u crikvu
nećedu donit
fala Bogu
i evropi
kojo će nas pameti
naučit
jer sprovodi
u crikvu nećedu
smit
a onda
obidi silni
po pedesetak judi
za obidon
i gledo se
ko će u skupji
restoran poć
a o noći
poslin
neću ni govorit
puno njih
ćedu se
alkohola nalit
da se možedu posli
folit
jo san popi toko
i rigo[15] san
priko kolone[16]
odriši dvadesetak
boci u more
dvodeset katridih
od kafićih
a ti
kako si ti pasala
jo san
prvi put u životu
i to sa kumon
seks imala
i bilo mi je lipo
od gušta san stenjala
i posli san lokala
po su me ko kreponu
doma donili
sad mi šušuro[19]
u glovi
ZBOGON LIPA MOJA MLADOSTI
vi koji vo čitote
sad ako morete
rutojte[20]
mene možete i
kritizairat
biskup me suspendirat
da ovako pop može pisat
a meni je
žol
mladosti
žol mi
je Crikve
tako mi Bog pomogo
istinu san reko
sad čujen proroka Jeremiju
"Putovi sionski tuguju
jer nema ko da dođe na svečanost, sva su vrata njegova razrušena, svećenici njegovi uzdišu, djevojke su njegove
porušene, a on sam pritisnut gorčinom...."
Jeruzolime, Jeruzolime, obrati se Gospodinu Bogu svome.
tako se pivalo u mojen ditinjstvu
na "Barabanu."[21]
"Barabon" je nesto, ne pivo se,
ali zato jemomo provi barabon
[1] malen
[2] pripremali
[3] vjeronauk
[4] majčin brat
[5] kuhinja
[6] dolazi
[7] ponedjeljak
[8] otišli
[9] trunka zaspao
[10] Čarape od kostreti (kozje dlake ) i ovčje vune
[11] žličica
[12] zadovoljan
[13] glavu
[14]stidu ljudskom
[15] povraćao
[16] stup za vezivanje brodova
[17] konop za vezivanje
[18] čamac
[19] zuji- šumi
[20] podrignuti
[21] Obred -koji završava sa štropotom - preneseno imamo urnebes