popodne

sunce upiče[1]

na molen mostu puno svita

vapor dohodi u valu

zvona ne zvonidu

popina bandira[2]

na vaporu se ne vije

nikor se ni ošrvo[3]

 

eno ga

vidin ga

mošu mu šudarićima[4]

fabriceri[5] s baldakinon[6]

križ s bandiron

kurot[7] u privijolu

popi u kotima

 

biskup na skale

pleskotonje[8]

najedon put

joja

pomidori

pokojan frotar

cili žut od joj

 

svit se

inkanto[9]

 

onda razbižo

ko ovce po vrhu

 

u crikvu šušur[10]

ajme tuču biskupa

doleti čovik

raširenih ruk

 

 

Gospe učin čudo

plač suze muk

 

......

 

trideset godišć posli

pun moli most svita

veseli

gledaju priko lanterne[11]

je vidiš gliser

 

milicioneri sa toki voki na rotu

 

enoga

vidin ga

zvona slavidu

gliser koštoje[12]

 

na isten mostu

na isten mistu

iskrcoje se kardinol

pleskotonje

živio kardinol

 

.....

I Gospe je učinila čudo

zvona opet zvonidu

svit radosno čeko biskupa

 

somo onih sa jojima

i pomidorima

nimo

nestali su

i ne bilo hi

nikad već

---

[1] prži

[2] papina zastava

[3] opazi

[4] maramica

[5] crkovinari

[6] baldahin, nebnica u procesiji

[7] župnik

[8] pljesak, pljeskanje

[9] zastao

[10] žamor

[11] svjetionik

[12] pristaje