bilo je to prid 40 godišć
vruće
zvizdon[1] peče
cicej[2]
zvona slavidu[3]
zvonidu
ređenje
jednega petka
prid Gospu od Kormena
u večer
puna crikva svita
danas će jedon postiranin
postat pop
......
ležin prid oltoron
zemja na zemji
čovik slob mižeran[4]
prid Bogon
grišnik ko i drugi
pozvon
brž[5] je bilo bojih
a jo sad govorin
evo me
i sad ovod na zemji
ležin
a pivoči[6] pivaju
GOSPODINE POMILUJ
a ko će nego GOSPODIN
i sad će nome DUH SVETI
znon da san ništa
znon da me pozvo
i evo me
SVETA MARIJO
ona je uvik igrala u mojen životu
na svoj nočin
molin je da ostane s menon
ONĐELI I ARHONĐELI....
mene oblije pot[7]
vruće mi je
i od arije[8] u crikvi
i od onega čo mislin
sad će me DUH SVETI ispunit
doboto[9] me stroh
čujen somo
SVETI PETRE
SVETI ANDRIJA
SVETI IVANE
mislin
somo da ne buden Juda
MOLI ZA NAS
MOLI ZA NAS
SVETI TOMA
SVETI JAKOVE
a jo čujen
voliš li me
vidiš Isuse
evo me prid tobom
na zemji
pot me oblije
sve mi je vrućje
i tako
redaju se sveci i svetice božje
u letanijima
čujen Isusa
di me pito
voliš me
jo mu odgovoron
tilon
koje leži na zemji
ne pito me ni za ocjene
ni za grihe
za ništa me ne pito
somo me pito
voliš me
a jo mokor ko voda
pivoči pivaju
OD DUHA BLUDNOSTI
a svit odgovoro
OSLOBODI NAS GOSPODINE
pasi ovce moje
pasi janjce moje
OD GROMA I ZLA VRIMENA
evo šaljem vas kao ovce među vukove
DA SE DOSTOJIŠ SVOJU SVETU CRKVU
pođite po svem svijetu
ne boj se maleno stado
DA SE DOSTOJIŠ OVOGA SLUGU SVOJEGA POSVETITI
jo grišan ko i drugi
ništa ne osjećon
nego veliki pot
ništa se ni prominilo
isti san
DA SE DOSTOJIŠ OVOGA SLUGO SVOJEGA ZAREDITI
jo ko voda
biskup stavije nome ruke
doje mi DUHA SVETOGA
ne osjećon ništa
biskupove
ruke na glovi
i svih ostalih popih
osjećon
ko piz[10]
sve teži
jo san isti
ništa se ni prominulo
ama baš ništa
svit vidi i čeko popa
a jo oni isti ko malo pri
imo jedna rozlika
veliko
on mi govori voliš me
a jo mu životon odgovoron
ti znoš da te volin
čujen riči
mladiću tebi kažem ustani
i dižen se
isti ko če san bi i pri
ništa se ni prominulo
ni krv ni meso
somo čujen njegovu rič
pođi
i išo san
raspet izmeju mene somega
i popa
če ga svit čeko
a drži me njegova rič
ja sam s vama do svršetka svita
i izduro san
četrdeset godišć
oni isti postirski mladić
od krvi i mesa
na zemji prid oltoron
i bogon
i sviton koji hoće popa
a jo i danas čujen njegovu rič
voliš me...
[1] sunce
[2] žega
[4] bijedan
[5] možda
[6] pjevači
[7] znoj
[8] zraka
[9] skoro
[10] teret