jedno pismo

Skužajte če van upadan ovako, no nakon sati i sati čitanja vašeg bloga i dugo premišljanja imam želju da vas pozdravim pa makar i ovako virtualno...
Odgojen san tradicionalno katolički u duvu kršćanskom i straju božjemen koji ne pozna samo stranu božju i đavolsku tj onu dobra i zla, di mi se od mali noguj tuvilo u glavu, ne učini drugemen ča nebiš ti da ko tebi učini tako da me vaše ove štorije nasmijedu do boli ili rasplaču do suza... zadnji 10 godišć jeman veliki križ u fameji, brinen se za teško bolesnog oca koji je zalega nepomičan i pa na ditinstvo noćima dežuran kroz male ure kratin mu muke privrćen i okrćen do jutrenje ava marije, taren, mećen gusku i već ča pripada bolesniku... u zolnje vrime me vataju a dosad nikad nisu tjeskobe slabovojnost i depresija tako da zadubiozin u crne misli ne radi križa kojeg nosin već zbog poruge judi '' vjernika, hrvata, katolika'' okolo mene koji me gledaju ko čudaka staromodnog i nazadnog samo zato šta poštijen onu ''poštuj oca i majku da dobro živeš i dobro ti bude na zemji'' pitan se kome ćedu ti dopast po store done kad zalegnu i obisidu in se pešnje didi po kakven socjalističkon ošpedalu...

No vaše štorije su me digle iz crni misli a i skratile mi male ure u dugin zimskin noćima, kako san živi jedno vrime na broču nase 12 godišć jer su me moji dali na skulu da izučin za škarpelina vrotili ste me u ta lipa vrimena kojo saon tamo proživi. jur dok štijen ovo o štrojkošin propia mi se pari da vidin pokojnu storu paronu u koje son sto 4 godišća i nagledo se škondali sa kuroton, susidiman a ka ni to nebi bilo dosta onda bi izventala čagol da se i ume prava uintrigo... Puno mi je žol če von činidu vako dišpete i uintrigajedu se u vas zanamisto da održajedu store užance koji već ninder ni, jo san proba vodit kantadure no nisan jema razumivanja za te rabote, do son bar jemo vas za kurata pito bi pošto amerika... a eto sad su nike nove mode u điru odenja po tin duhovnion obnovan di kojekokvi padavičari padadu ko sviće tamburadu u gitare i slišno a kad izajdedu o tamo nema ča ne činidu i u ča se sve ne uintrigajedu, no nećemo nikoga sudit...

Izašlo zlo na svit vaja se oduprit no nima svak kuraža ko vi... fala bogu u jedno stronu bog mi je da teret ali u drugu me obdori i sa raznin talentin da u ova teška vrimena svojin lavuron mogu namaknit pinez i priko svoji potribi... u rukan nema če neznon napravit, sviran 4 5 inštrumenti govorin par jezici a nauči san lavurot o mali noguj... divin se najveće ovin štorijan u rubriki ''kozerje'' toliko se nasmijen toj ''divoti'' nažalost vašin patnjama da nemogu zaspat koliko me smij razbudi... prišišali ste malo misto od smoje... škužajte če son se razbali vako na dugo i na široko, nodan se da vas nisan prioptereti... žal mi je ča spijete u 21 viku pod onakin palfunon iz kojego kapi i izahodidu talantere, a ponistre da i ne spominjen... i jo san spa tako u najlipjen ditinstvu ijadu puti ostinu i nazeba... ćutin ti led i danas... rado bi van čagol impošta i pomoga koliko se more... bog neka vas blagoslovi i poživi te odagna udobu ča se zaudobila meju svit i kantadure da veće bude lavura a manje intrige i škondali...

Fajen Isus i Marija