Partizonski penšjun[1]
u čast svima folsin[2] borciman svih ratih
grodi se veliko kuća
u vali[3]
za jednega visokega
poteštota[4]
u državi
u vojski
u UDBI
i čuje se po selu
svi koji dojdu
nalivat taracu
mišat bidun[5]
dobit ćedu
partinzonsku penšjun
došla je i teta bepina
tako san je zvo
jer je bila mlajo od mene
reko mi je poteštot
jer san prola pijate[6]
kad se nalivala taraca
da napišen molbu
da ću dobit
partizonsku penšjun
hoćete mi vi to napisat
rojena je posli rata
ali kad su bili partizani u selo
ona je sa mamon
i sa drugin curima
plela partizanima nozuke[7]
i dobila je
partizonsku penšijun.
a šjor poteštot
i meni govori
kad ste njoj onako lipo zdotali[8]
napište i vi
pok ćete dobit.
i napiso san
da san se rodi
kad i jugoslavija
i da je bi
koprifogo[9]
i da su talijoni kapitulrali
kad su vidili
ko se rodi
da ne slušo njihov kopirfogo.
Šjor poteštot je reko
ovo je dobro
dobit će te
Ali
umra je šjor poteštot
umrla je jugoslavija
a jo osto bez penšijuni
i puno godišć kašnje
iza domovinskog rata
reko je nikor[10]
ko je jamio jamio.
[1] partizanska mirovina
[2] lažni
[3] uvala
[4] mogućnik
[5] beton
[6] tanjure
[7] pletene čarape od ovčje vune
[8] sastaviti
[9] policijski sat
[10] netko