Crikva u Dolu je imala puno zemoj, dolcih sa lozjen i stron sa maslinodon. Imala je i puno buška i terena u Vrhu za pašu. Pok je dolsko Crikva imala puno vina i uja. Govorilo se: da je otvorit čep od bačvih, vino bi potokon teklo do Postir. Pok kad smo već kod vina spomenut ćemo i štoriju o komisiji za grodit župske kuće. Bili su u Postira i čuli da u Dolu imo lipega vina, ali dolski fabriceri, misleći da su ovi judi cukuni, tresali in brsatu. A ovi bez riči smistili župsku kuću na nojgoren mistu u selu. Da su je makor smistili di je bila storo kuća, a ne, nego je tresali baš ispod puta. I sad kuroti ploćaju buletu i spominju se škrtosti onih fabriceri. Da se ispuni rič Svetega pisma: Očevi jedoše kiselo grožđe, a sinovima trnu zubi.
Jedon dil plodovih zemje se je koristi za uzdržovonje crkve i drugi zgradi. I to je zemja upisona na Crkovinarstvo crkve u Dolu. Drugi dil zemoj je bi upison na Bratovštinu. I plodovi te zemje su se koristili za ulipšovonje crikve i liturgije. Kupovali su se križi, feroli, planite, dovali mise. A jednin dilon je izgrodjen i novi dil zgarde skule. Treći dil je upison na Župničko nadarje, a koristi je kurotu za uzdržovonje.
Ma inšoma, puno godišć se lavuralo na rozličite nočine crkveno introda. Jedon dil su lavurali bratimi ko obligu. Drugi dil se dovo judima na obradu, a on su dovali dohodak. U tim dohocima bilo je i neprovde kako je uvik neprovde kad se obradije tujo zemja. Gospodoru se zemje čini malo, a onima koji lavuraju je puno. I tako je došla prvo agrarna reforma i odnila je crikvi puno zemoj. Istini za voju država je dola nike vridonosnice, kao naknadu za odneseno, ali došo je drugi svjetski rat i sve je to propalo. A bilo je judi koji nisu tili intavulat na sebe da ne ploćaju porez i tako nisu ostvorili agror iako imaju doma kortu, š njon možedu užgat špaher da ne rečen čo lipjega. Nike zemje su i daje ostale crikvine, bratinske, ili župničko nadarje pok su judi dovali dohodak ili redovinu. Spominjen se da je puno storih Doljanih nosilo i grozja (nahodi se pun šufit obišenega grozja, pok se činilo vino za misu od tega i lipi prošek, jer se nosi plavac, crjenak i moli babić), u zornje vrime je kurot dobivo jedva koje kilo, a ovo godišće vragu zrna (ma isto san se naji lipega dolskega grozjo - neka ne mislu niki da ga baš nison ji!). Pok grozje za vino za misu kurot kupuje. Isto ko čo kupuje i drva. A puno od tih drv sigurno je posičeno u crkvenen bušku.
Veliko čeruponje je došlo posli drugega svjetskega rata. S jedne strone je došla novo agrarna reforma koja je ostavila crikvi Mihov rot i Dolac u selu. A judi su prisvojili ča su lavurali i već po nagovorima partijoših nisu dovali kurotu redovinu ili dohodak. I nakon rata su bratimi još kopali i lavurali kako Mihov rot, tako i crkvene Dolce.
Zapisono je kako su stori Doljani, njih kolo dvodeset svita, išlo svidočit u Postira 20. XII. 1946. prid Agrarnon komisijon da su Mihov rot i Dolci crkveni. I kad su se vrotili dočeko hi je mjesni „šef Reljo i uvrjedljivo dobacivao: Pojte, pojte, ma će isto sve poć nopoko. Ono je norod crikvi do, pok će njoj i uzet!" Ovo mišljenje se i danas nahodi u glovami nikih Doljanih, a posebice onih koji „štrajkaju." Pok san parfin ču od jedne puno pametne glove da su Bratovštine ko niko vrst socjalističkog saveza i to je lipo reko jedon koji se sa klapon u jutro rano sastaje u Vršu. A vajo reć radi istine da on imo i nojveće skulih u toj klapi, a pridruži in se kadikad jedon sa još većon skulon, pok je do pametnu izjavu: „da je puno hodi u crikvu i da mu je dosta, a sada neka gredu oni koji nisu hodili..." somo ću reć da baš ove koji sada gredu u crikvu kurot ni vodi u Trešt kupovat reloje.. I sva srića da nisu ovi drugi sa tako velikima skulima, jer koje bidu se gluposti onda vojale.
Mir ni bi od velike durode, jer su nojpri komunisti došli i odnili sve matične knjige, koje do dneva današnjega nisu vroćene. I u svojoj velikoj žešćini, čak su i župnu kuću u kojoj stoji kurot proglosili državnon i 8.VI. 1947. odredila općina Postira da kurot imo plotit 2.400 dinari fita i da mora plotit svaki misec 100 dinari. I tokalo je puno godišće don da se konačno kuća vroti i rješenjem Ustavnog suda potvrđeno da je kuća crkveno. A u maju 1948. rečeni Relja je pridloži da će on kupit od Župe novi dil škole: „jer boje je da čagod dobijete, i onako će van sve odnit."
E provo čeruponje je nastalo tek kada se 1961. odnilo novon nacionalizacijon sve crikvi. Ništa ni vridi zaključak Agrarne komisije iz 1946. Odnesen je tako Mihov rot, Dolci i Skula i puno drugih parceli koje su bile bratinske a obradivoli su hi drugi Doljani i danas hi držu, ali nikad nećedu bit njihove, jer su sada vlasništvo RH i to 1/1. A jo san te Doljane pozivo da se jovu, da tu stvor uredimo, jer da ćedu izgubit, ali su me onda izbukali.
Vojo radi istine reć i ovo da ni onda, 1961., se u Dolu ni potpuno poštovo zokon jer je konoba od skule ostavjena na upotrebu „u posjedu" Crikve, tako i Dolci ko i gornji dil Mihov rota. A znon kad san došo 1979. u Dol onda san sa klapon mlodih išo na podanak Mihov rota izvadit nikoliko hrebih od maslin, ča su hi drugi posikli došo je jedon od mjesne vlasti i sto beštimat na mene da ovo ni crkveno, nego državno. Za kurota je bilo državno a za one koji su posikli masline crkveno, pok se moglo.
I tako je duralo godišćima. Veliko otimonje crikvinega se dogodilo kad se probijala, cesta za tunel. Onda su namisto da gredu uz potok i lipo uzeli somo koji metar, a oni pasali doboto priko sri dolca. I to nikad nisu plotili. A za nike se govori da su se dobro naplotili za svoje. Govori mi je jedon fabricer, a sada jedon od vodećih štrajkoči da se crikvi oprosti porez na račun oduzetih dolci, a jo nošo u arhivu poziv na ploćonje poreza i to punih dvodeset godišć iza kako se odnilo dil dolcih za cestu. Donkle laže protiv, somo da naudi Župi.
I dogodilo se da se je osandesetih godišć tilo odnit crikvi i konobu. Nagovorili mlodu meštrovicu kojo je pena došla u Dol da promini luket na kjučanici. I kurotu ni ostalo drugo nego dignut tužbu za „ometanje posjeda." Općina Broč je stavila svoje svidoke, bili su to Meštrovica i jedon čovik u kojega su špešo hodili na dobre bokune sve glove Broča, od policije, priko komiteta do prešidenta općine i suda. I meštrovica je rekla da su njoj rekli u Dol da to nikad ni bilo crkveno. A i ovi Doljanin je isto reko da nikad ni bilo crkveno...Pok su tili to on i žena kašnje sakrit i tužili kurota biskupu da ga poteže po sudima, a on jadan ni kriv ni dužan, a sve je zapisono u dokumentima suda. . O kako će mu se sada rutovat, kad vidi da je sve crikvi vroćeno.
Nego, vajalo je kurotu noć svidoke za poć na sud svidočit da je konoba bila uvik crkveno. Moli san i nike crkovinore i pivoče da dojdu svidočit da je konoba bila uvik crkveno. Nisu tili: „znote jo ne mogu radi vega i nega rozloga (bojali su se na sudu govorit istinu da se ne bidu zamirili vlostima, jer Bože moj...) i za svidoke su se jovili pokojni Toni Zoje i Joski Pište, Bog in do roj, da hi zaludu ne spominjen. Kako ćedu se oni sada u raju radovot oven dobiću provde. Ma intanto ondašnji sud je vaze po konobe crikvi - da vuk bude sit i koza cila.
A onda su dvo brata tili vazest vrtle, jer in je reko diretur skule da možedu poć orat da je to skule. Kad san vidi da oni hoćedu poć u vrtal, jo san sto isprid traktora i reko san „U vrtal ćete priko mene mrtvega." Nastalo je vikonje, pripironje, dvadesetak svita stoji okolo, pok i niki od onih koji sada štrajkaju. I tako je to vikonje duralo niko vrime, a u kroniku je zapisono da je mama te braće bila nojžešćo u vikonju. Kad su vidili da ne moredu silon, povukli su se. I danas smo prijateji. I darovali su crikvi nike stvori. „Mi smo mislili da moremo, jer nan je rečeno da moremo. Vi ste bronili svoje, jer ste mislili da ste upravu. I sad vidimo da ste bili u pravu." Tako mi je reko jedon od njih. E svaka in čast. Ali onima falsunima okolo koji nisu tili priskočit u pomoć kurotu, neka sudi Bog. I zato me ne čudi ni današnja falsitod od tih judi.
I sada je počela borba za povrat imovine. Po je komunizam, raspala se komunistička, ajme škužojte, socjalistička Jugoslavija. Hrvotsko država je dola zokon po kojen se more vrotit imovina. I tadašnji kurot don Ljubo je podni zahtjev za povraton imovine.
Kad je ovi kurot došo dvi iljadete za kurota, onda je imo jedon susret sa Općinskom pravobraniteljicom kojo mu je rekla da će skulu u Splitskoj (jer tada je bi i kurot u Splitskoj) dobit nose, ali „skulu u Dolu nećete dobit nose nikada." Onda san se zakle da ću je dobit. I počela je borba. I niki dobri moji prijateji koji su bili tol i čuli su ča je ona rekla, virovoli su da to Župa nikad neće dobit.
Onda je došo "Badel" sa velikin planon kako će otvorit vinariju, kako će pokrenut sodnju loze sa domoćon sorton grozja, kako će ovo i ono. Gospe moja, čo ni sve obećovo. I jer je župa bila u posjedu konobe, pristo san da mu Općina Postira do ugovoron konobu. I potpiso se ugovor s tin da nakon 6 miseci do obračun, a da kad se izračuno njegovo ulogonje da onda fit gre u popravivonje zgrade. Nikada ni Općina ti obračun napravila. Ni uloži ni šolda u popravivonje zgrade. A posli san ču kako se i uknjiži na lupežariju na ničihove zemje. A ni za grozje koje je odovna vaze ni ploti. Po opet ti judi kojima ni ploti, protiv mene su! Kojo je to vrst judi!
Onda san jo došo do storih prijatej u Zagreb koji su mi pomogli doć do ministrice Ane Lovrin i ona me lipo tratala obidon u Saboru. Ji san sa puno velikih političarih. I svima san provjo zoč san tol. I svi su rekli da vajo vrotit i livi i desni, a bome i oni sridnji. I tako mi ministrica obećala da će doć na Veliki petak na prisjecun i osobno donit odluku o vraćonju. Ma ni došla...čeko san veće od godišća don, ali rješenje ni došlo a ministrica je pala. A predmet je ležo duboko u škafetinu, ko zno kojen.
I sad je opet tokalo izgubit vrimena, pustit da se novi ministar malo uputi, pok onda opet tražit vezu da me primi. I opet san dobi audijenciju. Ali su mi jovili da je u određeni don ministar hitno moro na put. I da će mi jovit kad će me primit.
Kroz to vrime san dobi informaciju da se za skulu i dolce more dobit velike pineze na stotine iljod eurih. A Badel provjo popima na Kandaloru kako će ispod dolcih iskopat velike konobe. A kad su mu popi rekli da je to crkveno, onako, rugajući se, je odgovori: Crkveni je škorup, a ono ispod će bit moje.
Kad su mi to popi rekli, a jo nakon Kandalore opoli pud Zagreba i opet onda hod od vrot do vrot. I ministar Šimonović me imo primit. A mene ćapala fibra 39 grodih fibre. Jedva govorin, oči suzu. I jedon prijatej kurot me odve svojin auton iz Koprivnice u Zagreb. Došo jo u ministarstvo u Dežmanovu ulicu onda su me ponudili sa čajen. I ministar me lipo primi. I jo mu dojen broj spisa, ali tega spisa ni. Onda je zvo još jednega šefa odjela i naredi mu je prid menon da pronojde spis, a da jo buden u kontaktu sa tin šefon. I kad je vidi ministar da mi je velo fibra, onda je reko šoferu da me službenin auton odvede do mista di me je čeko oni prijatej koji me opet odve u Koprivnicu.
Sad mi je bilo sve jasno. Čin je pustila fibra došo san doma odma san gurnu da se čini igralište, jer san zno da ako se učini igralište da se skula neće prodat bez dolcih. I tako se dogodilo. Nikomu nison govori da je spis nesto.
Spomenut ću ovod i štoriju kako je jedon došo i uze u nojom dolnji dil Mihov rota. A njega ni baš amo naš veliki štrajkoš i pivoč. Kad je oni poče čistit masline došo je ovi stariji k meni u kuću sto se trest, derat nome, da kojen san „krnevolu" do Mihov rot, da ne zno čistit masline i da to nikad nisu ni znali, da se storima dignut da bi vidi.. Tot je bila jedna osoba furešto kojo se u čudu zlamenivola da ovi pivoč ovako viče i vridjo kurota. Kad je išo ća, ovo mi osoba govori: da je tako mene vridjo u mojoj kući, bila bi ga izbocila iz kuće. Jo nison, i ni mi žo, jer su sada obadvo i „krnevol" i oni koji ga je proglosi „krnevolon" ujedinjeni u brobi protiv mene da me se istiro iz sela.
U ten vrimenu san jo neprestano urgiro i konačno se nošo spis i došlo je rješenje. Zazvoni san zvonima, ali su odma govorili zvon moj zvon, ali rješenje ni pravomoćno. Sve su niki znali.
U isto vrime počelo se govorit po selu kako skula ni crikvina, kako bi tokalo da ostane državna i slične gluposti. I tad je došo moj pokušaj da sposin Kandaloru da ne propode. Ali to se ćapalo na nož i iskoristilo za rat protiv mene. Kandalora je ostala kako su tili, a rat protiv mene žešći i daje. Parfin su i mlodi hodili po selu kupit potpise... A sadašnji glavor sela na don Boga Uskrsa, posli mise tuče šakon po oltoru i govori „Poć ćeš ća..."
Na drugoj bondi duro tihi rat. Državna odvjetnica mi neće da do informaciju je se žalila, a po zokonu mi je tribala dat tu informaciju. Obroti san se prijateju u Zagreb. A on me uputi da piton Upravni sud u Zagreb jesu se žalili. I lipo jo nazvo upravni sud i rekli su mi da nikakva žalba iz Supetor ni arivala, ali da mi to informacija ne vridi, nego da skalon sa interneta formulor i da pošjen pismeni zahtjev za potvrdu. Poslo san i nakon pet don je arivala potvrda.
I konačno povrat je pravomoćan.
Ali tek sada počimju zavrzlame. Na svetega Roka san objovi radosnu vist da je konačno presuda pravomoćna. Kad čujen komentor iza sebe, od jednega muškega, koji je sada „štrajkoč" „E ma ni se uknjiži." Prido je zahtjev za uknjižbu. I nakon pet šest don gledon na Internet. Općina stavila " plombu", hoće se i općina uknjižit na sve to. I sada je počelo natezonje, nikoliko puti na općinu, načelnik nojpri govori da ništa nezno, onda san napiso pismo. Pok su rekli da je greška advokata, pok ovamo, pok onamo. Nikako se uknjižit. Oni nikako neće da povuču plombu. Opet jo prijateju advokatu u Zagreb, a on napiso općini pismo. I reko mi je da ga je načelnik zvo na telefon i poče mu ništo tumačit. Ovi je reko da je to odvjetnička kancelarija i da nimo čo privatno govorit. Intanto natež, potež ipak su skalali plombu.
I konačno san dobi uknjižbu.
Kad san to postigo reko san da se nikor ne smi tamo parkirat. A Pave Zoje mi govori da mu je reko Badel da je to njegovo da se može parkirat. S koliko radosti su mi rekli da je bi sin od jednega koji je od firme Agrobrač i da je reko da će bit skula njegova. Vidilo se da mu je propja krivo če se skula vroćo Župi. Advokat mi je reko da ga pustin i da ništa ne činin da se ne bi ovi ozubili sa tužbom o ometanju posjeda, onda bi se to bilo oteglo godišćima. Eto mojih lipi judi, ma ni somo on takov.
Čin san dobi rješenje o pravomoćnosti, piso san Agrobraču, jer se Badel s njima ujedini. I prini je tamo crkvenu konobu, iako ni smi. I oni nisu meni ništa odgovorali, nego Općini, a na znonje Župi. Troži san da ploćaju najam, ali ni nakon dvo pisma nisu ništa odgovorili, a u međuvrimenu su veliki dil stvori odnili. Onda san do prijateju advokatu u ruke. I on ni je dvo puta piso, telefoniro obećovali su, ali ništa. I diglo se tužbu. I na poziv Suda nisu ništa odgovorili. I tokalo je donit presudu zbog ogluhe. I na tu presudu se čekolo dobrih petnajst miseci, E sad ovako, sad onako, intanto hodi san po sudu ko zno koliko puti i već san nji dodijo, a i bokun san se zapriti da ću poć u Ministra i urodilo je plodon.
Presuda je došla.
Čin san primi presudu reko san da se već ne smi nikor parkirat prid konobon, jer je sada to sve crkveno.
I presuda je pravomoćna.
Sada toko poć puten naplate, a ako ne budu tili milon (a mislin da nećedu), onda ćemo lipo silon! Sudsko izvršenje. Ajme če se temu radujen. Pok ćedu na zornju nike dolske šupje tikve kapit da je crikvino privatno vlasništvo i da crikva može upravijat po želji. A oni moredu puhat u vitar ili digod indi.
Ali čeruponje ni s tin završilo. Sada neće da ploćaju fit ili ti ga najam za igrališta. Noćemo lika i za to. Imo ga nemojte pensot. Boje na lipe, nego na grube. Jo san za lipe, ali ako me se tiro na grube, ok prihvaćan borbu i znon da ću je dobit.
Nego baš san ovih don dobi podatak da se nikad ni plotilo za cestu kojo je pasala priko crkvenega dolca. Ma ne somo za cestu. Nego su susidi lipo privojili svaki svoj komod dolca ko da je njihov. I to toko dovest u red.
I noj zornjo lupežarija crkvenega se dogodila kad su niki zakjučili da se ne do crikvi uje ča je po ugovoru pripado, nego su doli firmi kojoj je vozila njihovu dicu na nastupe dok su pivoli ko „Mladica", ali kad se moglo poć nastupat u Njemašku di bi se bilo lipo zarodilo(sve je bilo pripravjeno), onda su zabronili, govoreći kako dici smeto to skuli, da imaju jedinic, a meni iza škine su govorili drugo.
A ni ni puno lipjo štorija od tezih i dvora prid konobon. To se duperalo zbog pivonja u crikvi i da se „kurotu pomore u obradi vrta". I u ugovoru lipo stoji da će se sa drugin kuroton uredit stvor. A kad san poslo pismo di san pridloži produžetak ugovora sa ploćonjem fita, onda ga je dotični odbi, ni ga ti primit, a okolo se govori kako san jo veliki divjok. I svu rodbinu se nagovorilo da ne gredu u crikvu, jer da će me tako biskup potirot. A i pisma su išla biskupu. Ni mi to biskup reko, nego su mi rekli oni koji znaju za ta pisma.
Eto tako van je to. I vo štorija pomalo gre kraju. Bit će kašnje cirkusa kad oni koji nisu tili mene poslušot pok uredit zemje koje su bile na bratovštinu, a oni hi držu. Smijali su mi se i držali me ludin. Crikva je dobila svoje, a ostalo se pripisalo na Republiku Hrvatsku - sad neka išću. More hi država potirot kako hoće i ploćat ćedu fit državi. Neka, drogo mi je kad me nisu tili badovat, sad se vidi ko je pametan.